Sual_1. SOCAR-da işə qəbul olmaq üçün nə etməliyəm? Cavab: SOCAR-ın www.socar.az korporativ veb-saytının “karyera” bölməsinin “işə qəbul” bölümünün “vakansiyalar” hissəsini (http://careers.socar.az) mütəmadi olaraq izləməli, ixtisas və iş təcrübənizə uyğun vakansiyalar olduqda, vakansiyanın tələbləri ilə tanış olduqdan sonra “müraciət et” düyməsi vasitəsi ilə müraciət edərək işə qəbul müsabiqəsində iştirak edə bilərsiniz. İşə qəbul qaydaları haqqında daha ətraflı məlumatı http://careers.socar.az/JobRequirements linkindən əldə edə bilərsiz. |
Sual_2. SOCAR-da işə qəbul olmaq üçün vakansiya elan olunmadığı halda CV-mi (ərizə, anket və s.) necə göndərə bilərəm? Cavab: SOCAR-da işə qəbul yalnız http://careers.socar.az linkində elan olunan vakansiyalar üzrə elektron müraciət formasını doldurmaqla həyata keçirilir. İşə qəbul üçün elektron poçt (e-mail), faks, teleqram, telefonoqram və digər vasitələr ilə təqdim edilən müraciətlər və yazılı ərizələr müsabiqədə iştirak üçün əsas götürülmür. |
Sual_3. Elektron müraciət formasını doldurarkən texniki problemlərlə üzləşirəm. Nə etməliyəm? Cavab: Elektron müraciət formasının doldurulması qaydaları ilə http://careers.socar.az/JobRequirements linki vasitəsilə tanış ola bilərsiniz. Eyni zamanda bildiririk ki, müraciət formasını doldurarkən “Google Chrome” və ya “Mozilla Firefox” veb-brauzerlərinin son versiyalarından istifadə etmək məsləhət görülür. Müraciət forması 30 dəqiqə ərzində doldurularaq təsdiqlənmədiyi halda sistem müraciət formasını yadda saxlamadan avtomatik bağlaya bilər.
Yuxarıda qeyd olunanları yerinə yetirdiyinizə baxmayaraq, yenə də texniki problem yaranırsa, hr@socar.az e-mail ünvanına yazmaqla məlumat verə bilərsiniz. |
Sual_4. Vakansiyaya müraciət edərkən elektron müraciət formasında e-mail ünvanımı və ya hər hansı başqa məlumatı səhv qeyd etmişəm. Necə düzəliş edə bilərəm? Cavab: Müraciət formasında hər hansı məlumatı səhv qeyd etmisinizsə, bununla bağlı müraciət etdiyiniz vakansiya elanda olduğu müddətdə hr@socar.az e-mail ünvanına yazmaqla məlumat verə bilərsiniz. |
Sual_5. Müraciət etdiyim vakansiya üzrə iş təcrübəm olmadığı üçün sənədlərimin uyğun olmadığı cavabını almışam. Nə edim? Cavab: SOCAR-da elan olunan vakansiyaya müraciət etməmişdən əvvəl həmin vakansiyanın təsvir forması ilə ətraflı tanış olmanız və iş təcrübəsi tələb olunmayan vakansiyalara müraciət etməyiniz tövsiyə olunur. |
Sual_6. İşə qəbul prosesində istifadə olunan imtahanın sualları əvvəlcədən namizədlərə təqdim olunurmu? Əgər təqdim olunursa həmin sualları necə əldə etmək olar? Cavab: SOCAR-da işə qəbul müsabiqəsinin test imtahanı mərhələsində istifadə olunan test tapşırıqlarının nümunələri ilə saytımızın “Karyera” bölməsinin “Testləşdirmə” bölümünün “Test tapşırıqlarının nümunələri və mövzuları” hissəsindən (http://socar.az/socar/az/careers/assesment/test-samples) tanış ola bilərsiniz. |
Sual_7. FİN nədir? Onu necə əldə etmək olar? Cavab: Fərdi İdentifikasiya Nömrəsi (FİN) vakansiya üzrə elektron müraciət formasını doldurub təsdiqlədikdən sonra sistem tərəfindən sizə avtomatik təqdim edilən, eyni zamanda elektron müraciət formasında qeyd etdiyiniz elektron poçt ünvanınıza göndərilən 7 (yeddi) rəqəmli unikal nömrədir. Eyni zamanda həmin FİN və sizə göndərilən şifrə ilə müsabiqə mərhələlərinin nəticələrini də öyrənə bilərsiniz. |
Sual_8. Eyni vaxtda bir neçə vakansiya üzrə müraciət edə bilərəm? Cavab: İddiaçının müsabiqə prosesində olan yalnız bir vakansiya üzrə aktiv müraciəti ola bilər. İddiaçı həmin vakansiya üzrə müsabiqədə iştirakdan imtina etmədən (elektron müraciətini geri çəkərək) və ya müsabiqə prosesi sona çatmadan onun digər vakansiyaya müraciət etməsinə yol verilmir. |
Sual_9. Müraciət etdiyim vakansiya üzrə test imtahanından keçmişəm. Növbəti mərhələyə nə vaxt çağrılacağam? Cavab: İşə qəbul müsabiqəsinin növbəti mərhələsi olan fərdi müsahibə (peşə sınaq imtahanı) müvafiq vakansiya üzrə test imtahanı nəticələrinin məlum olması tarixindən sonra 15 iş günü ərzində təşkil olunur. Eyni zamanda nəzərinizə çatdırırıq ki, istehsalat zərurəti ilə əlaqədar olaraq göstərilən müddət uzadıla bilər. |
Sual_10. İşə qəbulla bağlı Test/Peşə Sınaq İmtahanı/Müsahibələrin keçirilmə ünvanı, tarixi və vaxtı haqqında məlumatı hardan əldə edə bilərəm? Cavab: İşə qəbul müsabiqəsinin mərhələləri (Test, Peşə sınaq imtahanı, Müsahibə) haqqında məlumat namizədin elektron poçt ünvanına və mobil telefonuna (sms) müvafiq bildirişlər şəklində imtahan vaxtından ən gec 3 (üç) gün əvvəl göndərilir. Eyni zamanda müsabiqə mərhələlərinin nəticələrini http://careers.socar.az/loginCom linkindən FİN və şifrənizi daxil etməklə öyrənə bilərsiniz. |
Sual_11. İmtahana dəvət olunmuşdum. Lakin müəyyən səbəblərdən iştirak edə bilmədim. Başqa vaxtda yenidən imtahan vermək mümkündür? Cavab: Təşkilati məsələlər baxımından test imtahanının, peşə sınaq imtahanının və ya müsahibənin başqa vaxta keçirilməsi mümkün deyil. Həmçinin imtahanda iştirak etmədiyiniz təqdirdə həmin vakansiya üzrə namizədliyiniz ləğv olunur. Yenidən başqa vakansiya üzrə müsabiqədə eyni prosedur qaydalarla iştirak edə bilərsiniz. |
Sual_12. Vakansiya üzrə müsahibədən keçməmişəm. Müsahibədə kimlərin uğur qazandıqları barədə məlumat ala bilərəm? Cavab: Müsabiqə mərhələsinin nəticələri barədə məlumatlar konfidensial xarakter daşıyır və yalnız namizədin şəxsən özünə təqdim edilə bilər. |
Sual_13. Müsabiqə nəticələri ilə razı deyiləm. Nəticəmə yenidən baxılması üçün necə müraciət edə bilərəm? Cavab: Müsabiqənin hər hansı mərhələsi barədə sualınız/narazılığınız yaranarsa, müsabiqənin başa çatdığı tarixdən etibarən 1 (bir) ay müddətində SOCAR-ın İnsan Resursları Departamentinin rəisinin adına ərizə yazmaqla müraciət edə bilərsiniz. SOCAR-da mövcud işə qəbul qaydalarına əsasən müsabiqə nəticələriniz araşdırılacaq və bu barədə sizə rəsmi məlumat veriləcəkdir. |
Sual_14. Bir vakansiya üzrə müsahibədə və ya peşə sınaq imtahanında iştirak edib uğursuz nəticə göstərdiyim halda yenidən həmin vakansiya üzrə müraciət edə bilərəm? Cavab: SOCAR-ın işə qəbul qayda və prosedurlarına əsasən müsabiqənin yekun seçim mərhələsində uğursuz nəticə göstərmiş namizədlərin eyni və ya daha yüksək dərəcəli vakansiyalara (eyni istiqamət üzrə) iddia etmək hüququ uğursuz müsabiqə tarixindən 3 ay keçdikdən sonra yaranır. |
Sual_15. İştirak etdiyim vakansiya üzrə müsabiqə nəticələrinə görə SOCAR-ın Kadr Ehtiyat Bazasına daxil edilmişəm. Kadr Ehtiyat Bazasına daxil edilmək nə deməkdir? Cavab: SOCAR-da mövcud işə qəbul qaydalarına əsasən müsabiqədə işə qəbul olunması tövsiyə olunmuş namizəd(lər)ə nisbətən qiymətləndirilmədə daha az bal toplamış, lakin müvafiq keçid balını toplamaqla müsbət rəy almış namizəd(lər) SOCAR-ın Kadr Ehtiyat Bazasına daxil edilir. SOCAR-da Kadr Ehtiyatı Bazasına daxil edilmiş vətəndaşların namizədliyi 12 ay ərzində saxlanılır. Həmin müddətdə KEB-ə daxil edilən iddiaçılar həmin struktur vahidində daxil edildiyi vəzifələr (peşələr) üzrə uyğun vakansiyalar olduqda kadr tələbatına əsasən işə qəbul oluna bilərlər. Eyni zamanda, digər struktur vahidləri üzrə uyğun vakansiyalar olduqda həmin vakansiyalar üzrə birbaşa müsabiqənin yekun seçim mərhələsinə cəlb oluna bilərlər. 12 ay ərzində uyğun vakansiya yaranmadığı təqdirdə vətəndaşın namizədliyi elektron poçt ünvanına (e-mail) və mobil telefon nömrəsinə (SMS) müvafiq bildirişlər göndərilməklə Kadr Ehtiyat Bazasından çıxarılır. |
Sual_16. Müsabiqədə iştirak etmədiyim təqdirdə SOCAR-dan iş təklifi gəlmişdir. Bu nə ilə əlaqədardır? Cavab: Siz saxta iş təklifi almış ola bilərsiniz. SOCAR-a işə qəbul ilə əlaqədar dələduzluq halları ilə bağlı http://careers.socar.az/vacancyInfo?type=1 linkindən ətraflı məlumat ala bilərsiniz. |
Sual_17. Əvvəllər SOCAR-da işləmişəm, yenidən SOCAR-a işə bərpa olunmaq üçün nə etməliyəm? Cavab: : SOCAR-da əmək münasibətlərinizə xitam verilibsə, SOCAR-da yenidən işlə təmin olunmaq üçün şirkətin http://careers.socar.az linkini mütəmadi izləyərək ixtisas və iş təcrübənizə uyğun vakansiyalar elanda olduqda, elektron müraciət formasını doldurmaqla müraciət edə bilərsiniz. Nəzərinizə çatdırırıq ki, əmək münasibətlərinizə xitam verilən zaman şirkətlə razılaşma protokoluna əsasən sizə müvafiq kompensasiya ödənilibsə SOCAR namizədliyinizə baxmamaq hüququnu özündə saxlayır. |
Sual_18. http://careers.socar.az linkində vakansiyalar yoxdur, bu nə ilə əlaqədardır? Cavab: SOCAR-da mövcud vakansiyalar onun müəssisələrinin tələbatına uyğun olaraq daxil olan sifariş əsasında rəsmi veb-səhifədə yerləşdirilir. Vakansiyaların yoxluğu işçi qüvvəsinə müvəqqəti olaraq ehtiyac olmaması deməkdir. |
Sual_19. Müsabiqədən kənar işə qəbul həyata keçirilən peşələr üzrə necə müraciət edə bilərəm? Cavab: Xüsusi peşə və ixtisas biliklərinin yoxlanılması tələb olunmayan bəzi peşələr (xadimə, dalandar, və s.) üzrə işçilərin işə qəbulu mövcud qanunvericiliyə uyğun olaraq bilavasitə SOCAR-ın müəssisələri tərəfindən həyata keçirilir. Siyahıda göstərilən peşələr üzrə vakansiyalar haqqında məlumatı vakansiyanın yarandığı müəssisənin Kadrlar şöbəsindən əldə edə bilərsiniz. |
Sual_20. Təlim Tədris və Sertifikatlaşdırma İdarəsinin təlim mərkəzlərində peşə təhsili alaraq məzun olmuşam, nə zaman iş təklif olunacaq? Cavab: SOCAR-da kadr tələbatına uyğun olaraq, peşənizə uyğun vakansiya yarandığı təqdirdə namizədliyinizə baxılacaqdır. |
Sual_21. SOCAR-a işə qəbul ilə bağlı ərizə ilə müraciət etmişəm, cavabını necə öyrənmək olar? Cavab: “Vətəndaşların müraciətləri haqqında” Azərbaycan Respublikasının Qanununa müvafiq olaraq sizin müraciətiniz, qanunvericilikdə nəzərdə tutulan müddət ərzində baxılıb cavablandırılacaqdır. |